ການປູກໝາກຖົ່ວດິນ
ຖົ່ວດິນເປັນພືດນ້ຳມັນທີ່ມີອາຍຸສັ້ນ ໃຊ້ປະໂຫຍດໃນຮູບເມັດດິບ ແລະ ເມັດແຫ້ງ ທຸກພາກຂອງປະເທດເຮົາສາມາດປູກໄດ້.
I. ສະພາບແວດລ້ອມທີ່ເຫມາະສົມ.
ດິນທີ່ເຫມາະສົມສຳລັບການປູກຖົ່ວດິນຄວນເປັນດິນຫນ້າເລິກ, ລະບາຍນ້ຳໄດ້ດີ, ບໍ່ມີນ້ຳຂັງ, ຫນ້າດິນບໍ່ຄວນແຫນ້ນ ຫລື ແຂງ ເພາະເວລາເກັບກ່ຽວຈະເຮັດໃຫ້ຝັກຂາດ ແລະ ຄ້າງຢູ່ໃນດິນ. ອຸນຫະພູມສະເລ່ຍສຳລັບການຈະ ເລີນເຕີບໂຕແມ່ນປະມານ 30 ອົງສາເຊ ຖ້າອຸນຫະພູມຕ່ຳກວ່ານີ້ຖົ່ວດິນຈະງອກຊ້າກວ່າປົກກະຕິການຂາດນ້ຳໃນໄລຍະທີ່ຖົ່ວດິນ ກຳລັງແຕກຫນໍ່ ແລະ ສ້າງຝັກຈະມີຜົນກະທົບຕໍ່ຜົນຜະລິດຫລາຍທີ່ສຸດ.
1. ການກະກຽມດິນ.
ຄວນໄຖດິນປູກເພື່ອກຳຈັດຫຍ້າ ແລະ ເຮັດໃຫ້ດິນຜຸ່ຍເຫມາະສົມກັບການແຕກງອກ ໂດຍການໄຖດິນໃຫ້ເລິກປະມານ 10-20 ຊັງຕີແມັດ, ທັບ ແລະ ພວນດິນໃຫ້ລະອຽດ. ການປູກຖົ່ວດິນໃນລະດູແລ້ງໂດຍໃຊ້ນ້ຳຊົນລະປະທານຄວນຍົກຮ່ອງປູກເພື່ອສະດວກໃນການໃຫ້ນ້ຳຄວາມກວ້າງຂອງສັນຮ່ອງແມ່ນຂຶ້ນກັບເນື້ອດິນ ຖ້າເນື້ອດິນແຫນ້ນ ຄວນເຮັດຮ່ອງແຄບສັນຮ່ອງກວ້າງປະມານ 60-90 ຊັງຕີແມັດ. ເຮົາສາມາດປູກຖົ່ວດິນໄດ້ 2 ແຖວຖ້າວ່າດິນລະບາຍນ້ຳໄດ້ດີອາດຈະຂະຫຍາຍຂະຫນາດຮ່ອງໃຫ້ກວ້າງຂຶ້ນເຖິງ 1,5 ແມັດ, ການປູກຫລັງເກັບກ່ຽວເຂົ້ານາ ໂດຍອາໄສຄວາມຊຸ່ມໃນດິນ ແລະ ບໍ່ມີການໃຫ້ນ້ຳຕ້ອງມີເງື່ອນໄຂຄື: ຕ້ອງມີລະບົບນ້ຳໃຕ້ດິນຕື້ນ ແລະ ມີປະລິມານນ້ຳພຽງພໍຕໍ່ກັບການຈະເລີນເຕີບໂຕຈົນເຖິງການເກັບກ່ຽວ. ການກຽມດິນຕ້ອງເຮັດຫລາຍຄັ້ງເພື່ອໃຫ້ຫນ້າດິນລະອຽດ ເພື່ອຫລຸດຜ່ອນການລະເຫີຍນ້ຳຈາກດິນ ແລະ ເຫມາະສົມແກ່ການແຕກຫນໍ່ຂອງຖົ່ວດິນ.
2. ການກຽມເມັດພັນ.
ເມັດພັນທີ່ໃຊ້ຄວນມີຄວາມສົມບູນປະມານ 70%, ແກະເມັດອອກ ແລະ ປູກພາຍໃນ 1 ເດືອນ, ຄວນແຊນ້ຳກ່ອນປູກ 4-5 ຊົ່ວໂມງ ໃຫ້ແກ່ນແຕກຫນໍ່ກ່ອນຈິ່ງນຳໄປປູກຈະຊ່ວຍໃຫ້ເມັດງອກໄວ ແລະ ສະຫມ່ຳສະເຫມີດີກວ່າເມັດທີ່ບໍ່ໄດ້ແຊ່ນ້ຳ. ຄວນຄວບຄຸມເມັດດ້ວຍສານປ້ອງກັນເຊື້ອລາ ແມນໂຄແຊບ (ໄດເທນ M45) ໃນອັດຕາ 3 ກຣາມຕໍ່1 ກິໂລ ຫລື ໂບໂນມິນ (ເບນເລດ) ປະສົມຄາບອກຊິນ (ໄວຕາແວັດ) ໃນອັດຕາ 3-4 ກຣາມຕໍ່ 1 ກິໂລ ຫລື ລິໂດມິນ MZ 72 ໃນອັດຕາ 3 ກຣາມຕໍ່ 1 ກິໂລ. ການຄວບຄຸມເມັດບໍ່ຄວນໃຊ້ສານຊະນິດດຽວຕິດຕໍ່ກັນຫລາຍລະດູການ ເພາະວ່າເຊື້ອລາຈະລຶ້ງກັບຢາ, ປະລິມານທີ່ໃຊ້ໃນການປູກ (ສຳລັບເມັດທີ່ແຕກງອກແລ້ວ) 15-20 ກິໂລຕໍ່ໄລ່.
3. ລະດູການປູກ.
ຕົ້ນລະດູຝົນ: ປະມານເດືອນ ເມສາ ຫາ ເດືອນ ພຶດສະພາ, ເກັບກ່ຽວປະມານເດືອນກໍລະກົດ ຫາ ເດືອນ ສິງຫາ.
ປາຍລະດູຝົນ: ປູກຕັ້ງແຕ່ ເດືອນກໍລະກົດ ຫາ ເດືອນສິງຫາ ແລະ ເກັບກ່ຽວປະມານ ເດືອນ ຕຸລາ ຫາ ເດືອນພະຈິກ.
ລະດູແລ້ງ: ປູກໂດຍອາໄສນ້ຳຊົນລະປະທານເລີ່ມແຕ່ເດືອນ ທັນວາ ຫາ ເດືອນມັງກອນ ເກັບກ່ຽວໃນເດືອນເມສາ ຫາ ເດືອນພຶດສະພາ, ປູກໂດຍອາໄສຄວາມຊຸ່ມໃນດິນປູກໃນເດືອນ ພະຈິກ ຫາ ເດືອນທັນວາ ເກັບກ່ຽວໃນເດືອນກຸມພາ ຫາ ເດືອນ ເມສາ.
4. ການປູກ.
ເພື່ອຢາກໃຫ້ເມັດງອກງາມຢ່າງສະຫມ່ຳສະເຫມີຄວນຝັງເມັດເລິກປະມານ 2 ຊັງຕີແມັດ,ໄລຍະຫ່າງລະຫວ່າງແຖວປະມານ 30 ຊັງຕີແມັດ ຕົ້ນຖົ່ວຈະຄວບຄຸມພື້ນທີ່ໄດ້ໄວ ແລະ ແຂ່ງຂັນກັບວັດສະພືດໄດ້ດີ, ແຕ່ຖ້າປູກໃນໄລຍະຫ່າງລະຫວ່າງແຖວ ປະມານ 40-50 ຊັງຕີແມັດ ຈະຊ່ວຍໃຫ້ກຳຈັດວັດສະພືດສະດວກຂຶ້ນ, ໄລຍະຫ່າງລະຫວ່າງຂຸມປະມານ 20 ຊັງຕີແມັດ, ໃຊ້ເມັດ 2-3 ແກ່ນຕໍ່ຂຸມ.
5. ການໃສ່ປຸ໋ຍ.
ຖ້າເປັນດິນກົດ pH ຕ່ຳກວ່າ 4,5 ຄວນມີການໃສ່ປຸ໋ຍເພື່ອປັບສະພາບດິນກ່ອນ ໂດຍທົ່ວໄປຖ້າເປັນດິນຊາຍຈະໃຊ້ປູນຂາວໃນອັດຕາ 100-105 ກິໂລຕໍ່ໄລ່ ແລະ 200-500 ກິໂລຕໍ່ໄລ່ ໂດຍໃສ່ກ່ອນປູກ 1-2 ອາທິດ ແລ້ວເອົາດິນຖົມປູນຂາວ ນອກຈາກຈະຊ່ວຍປັບສະພາບຄວາມເປັນກົດ, ເປັນດ່າງຂອງດິນແລ້ວ ຖ້າຢາກເພີ່ມທາດແຄນຊຽມໃຫ້ໃສ່ປູນຂາວ ໂດຍການໂຮຍໃສ່ຂ້າງແຖວປູກໃນໄລຍະທີ່ຖົ່ວດິນກຳລັງຢັ່ງຮາກ (50-55 ມື້ ຫລັງງອກ) ໃສ່ໃນອັດຕາ 50-100 ກິໂລຕໍ່ໄລ່.
6. ການປ້ອງກັນ ແລະ ກຳ ຈັດເຊື້ອໂລກ.
ເຊື້ອໂລກທີ່ສຳຄັນ ແລະ ທຳລາຍຜົນຜະລິດຂອງຖົ່ວດິນມີດັ່ງນີ້:
- ພະຍາດເມັດເນົ່າ ຫລື ຕົ້ນເນົ່າ: ຄວນໃຊ້ແຄບຕາໂຟນ (ໄດໂຟລາແທນ) ຫລື ໄທແລມ (ເທີຊານ) 2ບ່ວງແກງ ປະສົມໃສ່ເມັດ 1ກິໂລ.
- ພະຍາດໃບຈຸດ: ແນະນຳໃຫ້ໃຊ້ ຄໍໂລທາໂລນີດ (ຄາໂລນີດ) ຫລື ໃຊ້ເດດຊີນ MX (ສານປະສົມ ເບໂນມີດ ກັບ ແມນໂຄເຊບ) ໃຊ້ 2-3ບ່ວງແກງປະສົມນ້ຳ 20ລິດ ສີດພົ່ນທຸກໆ 7-15ວັນ ຫາກພົບວ່າໂລກໃບຈຸດລຶ້ງກັບຢາໃຫ້ປ່ຽນໃຊ້ສານເຄມີຊະນິດອື່ນ.
- ພະຍາດຝັກເປັນບາດ ແລະ ເປັນຫູດ ຈາກຂີ້ກະເດືອນຝອຍ: ແນະນຳໃຫ້ໃຊ້ ອັດດິຄາບ 10ກຣາມ ຫລື ຄາໂບຟູລານ (ຟູລາດານ) 3ກຣາມ ໂຮຍໃສ່ຂຸມ ຫລື ຮອບຂຸມ ແລ້ວເອົາດິນຖົມສານທັງສອງຊະນິດນີ້ອາດເຮັດໃຫ້ ໃບພືດໄຫມ້ແຕ່ອາການດັ່ງກ່າວຈະຫາຍໄປເອງ.
7. ການປ້ອງກັນ ແລະ ກຳ ຈັດແມງໄມ້.
ແມງໄມ້ ຫລື ສັດຕູພືດທີ່ສຳຄັນ ແລະ ນຳຄວາມເສຍຫາຍຢ່າງຮ້າຍແຮງສຳລັບຖົ່ວດິນໄດ້ແກ່: ສ້ຽນດິນ ແລະ ປວກ ໃຫ້ສີດພົ່ນດ້ວຍຢາຄໍໄພລີຟອດ (ລອດແບນ 40EC) ສີດພົ່ນລະຫວ່າງແຖວຖົ່ວດິນໃນເວລາທີ່ຖົ່ວດິນຢັ່ງຮາກ ແລະ ສີດພົ່ນອີກຄັ້ງຫລັງຈາກນັ້ນ 2 ອາທິດ ຫລື ອາດຈະໃຊ້ ຄາໂບຟານ (ຟູຣາດານ 3G ໂຮຍພ້ອມກັບປຸ໋ຍໃຫ້ໂຮຍໃສ່ຂ້າງແຖວຖົ່ວດິນ ຫລັງຈາກເສຍຫຍ້າຄັ້ງທີສອງ ຫລື ເມື່ອອາຍຸຖົ່ວດິນໄດ້ 30-35 ມື້ ຄວນແບ່ງໃສ່ສອງຄັ້ງຄື: ຄັ້ງທຳອິດເມື່ອອາຍຸໄດ້ 30-35 ມື້ ແລະ ຄັ້ງທີສອງເມື່ອອາຍຸໄດ້ 60-65 ມື້.
8. ການເກັບກ່ຽວ.
ເມື່ອສັງເກດເຫັນຫມາກຖົົ່ວດິນແກ່ໄດ້ 60-80% ກໍ່ສາມາດເກັບກ່ຽວໄດ້ຄວນຖອນ ແລະ ເກັບເອົາຫມາກໃຫ້ສຳເລັດ ຫລັງຈາກເກັບເອົາຫມາກຖົ່ວດິນແລ້ວໃຫ້ຮີບຟ້າວຕາກແດດໃຫ້ແຫ້ງແລ້ວນຳໄປໄວ້ບ່ອນທີ່ໂລ່ງ ແລະ ອາ ກາດຖ່າຍເທໄດ້ດີ ໂດຍຖອກຖົ່ວດິນໃສ່ເທິງຜ້າຢາງຫນາເຂ່ຍຫມາກຖົ່ວດິນແຕ່ລະກອງໃຫ້ບາງ ຖ້າເກັບເອົາຫມາກຖົ່ວດິນບໍ່ທັນໃນມື້ທີ່ເກັບກ່ຽວ (ຖົ່ວດິນຍັງຕິດກັບຕົ້ນ) ໃຫ້ລຽງຕົ້ນທີ່ຫລົກຂຶ້ນມາລຽນເປັນແຖວຫງາຍດ້ານ ຫມາກຂຶ້ນບໍ່ຄວນກອງຕົ້ນຖົ່ວດິນທີ່ຍັງບໍ່ທັນເກັບເອົາຫມາກໄວ້ບ່ອນດຽວ ເພາະຈະເຮັດໃຫ້ເກີດເຊື້ອລາທີ່ຫມາກ ແລະ ຈະໄດ້ເມັດທີ່ມີຄຸນນະພາບຕ່ຳ.