ການລ້ຽງຈິຫຼໍ່
ຈີ່ລໍ່ເປັນແມງໄມ້ເສດຖະກິດທີ່ນິຍົມບໍລິໂພກກັນຢ່າງແພ່ຫລາຍ, ລົດຊາດແຊບ, ມີໂປຣຕີນສູງ ແລະ ຄວາມຕ້ອງການຂອງຕະຫລາດຍັງສູງ, ແຖມຕົ້ນທຶນຍັງຕ່ຳ, ສຳລັບຈີ່ລໍ່ສ່ວນໃຫຍ່ແລ້ວຜູ້ລ້ຽງຈະນຳຈີ່ລໍ່ມາເປັນອາຫານ ໂດຍການແປຮູບຂົ້ວ ຫລື ຈືນຂາຍ ຕາມຕະຫລາດທົ່ວໄປ ຫລື ເຮັດເປັນຈີ່ລໍ່ໍ່ອັດກະປ໋ອງເພື່ອເພີ່ມມູນຄ່າໃຫ້ກັບຈີ່ລໍ່ ແລະ ເພີ່ມຊ່ອງທາງການຂາຍ, ສ່ວນວິທີການເພາະລ້ຽງຈີ່ລໍ່່ມີຂັ້ນຕອນທີ່ບໍ່ຫຍຸ້ງຍາກປານໃດ, ໃຊ້ພື້ນທີ່ໃນການລ້ຽງບໍ່ຫລາຍເຫມາະກັບຜູ້ທີ່ຕ້ອງການຫາອາຊີບໃຫມ່ໆ.
ການເພາະລ້ຽງຈີ່ລໍ່ໍ່ຕາມວິທີການທີ່ຈະນຳສະເຫນີນີ້ເປັນວິທີທີ່ສະດວກ ແລະ ລົງທຶນບໍ່ຫລາຍ, ເປັນການເພາະລ້ຽງໃນຕູ້ໄມ້ທີ່ເຮັດຂຶ້ນແບບໂປ່ງ, ເຮັດໃຫ້ອາກາດຖ່າຍເທໄດ້ສະດວກສາມາດເຮັດຄວາມສະອາດໄດ້ງ່າຍແຖມຍັງໃຊ້ຕົ້ນທຶນໃນການເພາະລ້ຽງບໍ່ສູງນຳດ້ວຍ.
ຈີ່ລໍ່ເປັນສັດລ້ຽງວົງຈອນເມື່ອວາງໄຂ່ 9-10 ວັນ ຈະຟັກເປັນຕົວອ່ອນ, ເວລາປະມານ 45-50 ວັນ ກໍ່ໃຫຍ່ເຕັມໂຕ, ຫລັງຈາກນັ້ນ ຈະປະສົມພັນກັນ 3-4 ວັນ, ແລ້ວ 1-2 ວັນ ກໍ່ວາງໄຂ່ອີກ, ພໍໃຫຍ່ເຕັມໂຕແລ້ວພ້ອມຈຳຫນ່າຍໄດ້ລາຄາສູງອີກ.
ສ່ວນອຸປະກອນໃນການເພາະລ້ຽງຈີ່ລໍ່ແມ່ນຈະໃຊ້ໄຂ່, ເຊິ່ງໄຂ່ຈີ່ລໍ່ສາມາດຫາຊື້ໄດ້ຈາກຜູ້ທີ່ເພາະລ້ຽງຢູ່ແລ້ວລາຄາບໍ່ສູງ, ສຳລັບຕູ້ໄມ້ທີ່ຈະໃຊ້ລ້ຽງຈີ່ລໍ່ຕ້ອງເປັນຂະຫນາດກວ້າງ 90 ຊັງຕີແມັດ, ຍາວ 160 ຊັງຕີແມັດ ແລະ ສູງ 80 ຊັງຕີແມັດ, ສ່ວນຝາດ້ານຂ້າງປົກດ້ວຍໄມ້ອັດ ແລະ ດ້ານລຸ່ມປົກດ້ວຍຕາຫນ່າງມຸ້ງລວດ, ລັງໄຂ່ແບບກະດານ 4-5 ລັງຕໍ່ຕູ້ ແລະ ຈານສຳລັບໃສ່ອາຫານ, ນ້ຳໃຫ້ຈີ່ລໍ່.
ວິທີລ້ຽງຈີ່ລໍ່ຕາມໄລຍະວົງຈອນໂດຍເລີ່ມຈາກໄລຍະໄຂ່ຕົວອ່ອນ, ໄລຍະເວລາຈາກການຟັກຕົວຈາກໄຂ່ຈີ່ລໍ່ເປັນຕົວອ່ອນຈະໃຊ້ໄລຍະເວລາ 7-10 ວັນ, ເມື່ອຟັກອອກມາເປັນຕົວອ່ອນແລ້ວໃຫ້ນຳເອົາຕົວອ່ອນຂອງຈີ່ລໍ່ໄປໃສ່ໃນຕູ້ລ້ຽງທີ່ກຽມໄວ້, ຖ້າຫາກພື້ນຕູ້ໃຊ້ລວດຕາຫນ່າງປູຄວນຈະໃຊ້ຜ້າປູຮອງພື້ນກ່ອນ ເພື່ອປ້ອງກັນຈີ່ລໍ່ຕົວອ່ອນລອດ ອອກໄປ, ພ້ອມທັງລະວັງມົດ, ຈີຈ້ຽມ ແລະ ກັບແກ້ມາກິນຕົວອ່ອນຂອງຈີ່ລໍ່.
ສ່ວນການໃຫ້ອາຫານໃນໄລຍະທຈີ່ລໍ່ຍັງເປັນຕົວອ່ອນຢູ່ຕ້ອງເປັນຫົວອາຫານໄກ່ນ້ອຍບົດປະສົມກັບຮຳອ່ອນໃນອັດຕາສ່ວນ1/1 ແລະ ນ້ຳຄວນໃຊ້ຟອງນ້ຳຊັບນ້ຳໃຫ້ຊຸ່ມແລ້ວວາງໃນຕູ້ລ້ຽງຈີ່ລໍ່ຕົວອ່ອນ, ຈີ່ລໍ່ຕົວອ່ອນຈະດູດກິນນ້ຳທີ່ຟອງນ້ຳ, ບໍ່ຄວນໃຫ້ນ້ຳໂດຍໃສ່ຖ້ວຍ ຫລື ຈານ ເພາະຈະເຮັດໃຫ້ຕົວອ່ອນຈົມນ້ຳ. ຫລັງຈາກຈີ່ລໍ່ມີຂະຫນາດ ໂຕໃຫຍ່ຂຶ້ນໂດຍໃຊ້ເວລາປະມານ 5-7 ວັນກໍ່ເອົາຜ້າທີ່ປູພື້ນອອກແລ້ວນຳໄປຊັກທຳຄວາມສະອາດດ້ວຍນ້ຳ (ຫ້າມໃສ່ແຟັບ) ເພື່ອກຽມໄວ້ໃຊ້ສຳລັບການລ້ຽງຈີ່ລໍ່ໃນຄັ້ງຕໍ່ໄປ.
ສຳລັບ ການໃຫ້ອາຫານໃນໄລຍະເວລາທີ່ຈີ່ລໍ່ເລີ່ມໃຫຍ່ແມ່ນຈະໃຊ້ອາຫານໄກ່ສຳລັບລູກໄກ່ບົດໃຫ້ລະອຽດປະສົມກັບຮຳໃນອັດຕາສ່ວນ 1/1 ເຊັ່ນກັນ, ນອກນັ້ນຍັງມີໃບມັນຕົ້ນ, ໃບຫມາກອຶ ແລະ ຫມາກອຶມາໃຫ້ຈີ່ລໍ່ກິນເສີມໄດ້ຕາມທຳມະຊາດ ແລະ ການໃຫ້ນ້ຳໂດຍໃຊ້ພາຊະນະກົ້ນຕື້ນ ຫລື ຈານແລ້ວວາງກ້ອນຫີນກ້ອນນ້ອຍໆໄວ້ໃນຈານ ເພື່ອໃຫ້ຈີ່ລໍ່ເກາະກິນນ້ຳໄດ້ງ່າຍ.
ໄລຍະປະສົມພັນ ແລະ ວາງໄຂ່ຈາກຕົວອ່ອນຫາຕົວເຕັມໄວຈະໃຊ້ເວລາປະມານ 45-50 ວັນ, ຫລັງຈາກຈີ່ລໍ່ໃຫຍ່ເຕັມທີ່ແລ້ວຈະເປັນໄລຍະປະສົມພັນ, ສະນັ້ນ ຜູ້ລ້ຽງຈະຕ້ອງສັງເກດເບິ່ງຫາກວ່າຈີ່ລໍ່ເລີ່ມປະສົມພັນແລ້ວອີກປະມານ 3-4 ວັນ ຈີ່ລໍ່ຈະເລີ່ມວາງໄຂ່ໃຫ້ນຳເອົາຖາດໃສ່ຂີ້ເຖົ່າແກ່ປົກວາງໄວ້ໃນຕູ້ຈີ່ລໍ່ຈະຂຶ້ນວາງໄຂ່ເທິງຖາດຂີ້ເຖົ່າຫລັງຈາກຈີ່ລໍ່ວາງໄຂ່ສຳເລັດແລ້ວໃຫ້ນຳໄຂ່ຈີ່ລໍ່ໃນຂີ້ເຖົ່າ ຫລື ດິນປະສົມສຳລັບປູກພືດໃສ່ເກັບໄວ້ໃນກ່ອງໂຟມຢ່າໃຫ້ແຫນ້ນເກີນໄປເກັບໄວ້ໃນບ່ອນທີ່ອາກາດຖ່າຍເທສະດວກ ເພື່ອລໍຖ້າເພາະລ້ຽງໃນໄລຍະຕໍ່ໄປ, ສ່ວນຈີ່ລໍ່ທີ່ໃຫຍ່ເຕັມທີ່ແລ້ວກໍ່ນຳມາຂົ້ວ ຫລື ຂາຍກໍ່ໄດ້, ເມື່ອເກັບຈີ່ລໍ່ອອກແລ້ວໃຫ້ເຮັດຄວາມສະອາດຕູ້ໄວ້ເພື່ອລໍຖ້າລ້ຽງຈີ່ລໍ່ໃນໄລຍະຕໍ່ໄປ.