ປູກໝາກນາວແບບໃດໃຫ້ ໄດ້ຜົນຜະລິດສູງ
ຫມາກນາວເປັນຫມາກໄມ້ຊະນິດຫນຶ່ງທີ່ມີວິຕາມິນຊີສູງ , ນິຍົມບໍລິໂພກຫລາຍໃຫ້ຄຸນປະໂຫຍດໄດ້ທັງນ້ຳແລະເປືອກເພາະຫມາກນາວມີກົດອິນຊີຫລາຍຊະນິດເຊັ່ນ: ກົດຊີຕິກ , ກົດມາລິດແລະວິຕາມິນຊີເຊິ່ງໄດ້ມາຈາກນ້ຳຫມາກນາວ , ຍັງຊ່ວຍເສີມສ້າງໃຫ້ຮ່າງກາຍແຂງແຮງ , ຕ້ານທານກັບພະຍາດໄດ້ດີ , ຫມາກນາວຍັງມີຄຸນປະໂຫຍດທາງການຢາເປັນຕົ້ນຊ່ວຍຮັກສາໂລກເລືອດອອກຕາມແຂ້ວ , ອາການທ້ອງອືດ , ຂັບລົມ , ແກ້ວິນວຽນ . ນອກຈາກນີ້ຍັງມີຄຸນປະໂຫຍດດ້ານຄວາມງາມນຳອີກ .
ຫມາກນາວເປັນພືດທີ່ສາມາດປູກໄດ້ໃນດິນເກືອບທຸກຊະນິດບໍ່ວ່າຈະເປັນດິນຫນຽວ , ດິນຊາຍ , ແຕ່ຖ້າຕ້ອງການຈະປູກຫມາກນາວໃຫ້ໃຫຍ່ໄວ , ມີຫມາກດົກແລະຄຸນນະພາບດີກໍ່ຄວນຈະປູກໃນບ່ອນທີ່ເປັນດິນຜຸຜຸ່ຍ , ມີການລະບາຍນ້ຳໄດ້ດີ , ມີທາດຈຸລິນຊີປະສົມຢູ່ຫລາຍແລະຄວນເລືອກບ່ອນທີ່ຢູ່ໃກ້ແຫລ່ງນ້ຳ .
ການກຽມເນື້ອທີ່ປູກ ຖ້າຫາກເນື້ອທີ່ຕ່ຳໃຫ້ເຮັດຄັນດິນໂດຍໃຫ້ກວ້າງປະມານ 6-8ແມັດສ່ວນຄວາມສູງແມ່ນໃຫ້ສັງເກດຈາກປະລິມານນ້ຳທີ່ເຄີຍຖ້ວມໂດຍໃຫ້ຢູ່ສູງກວ່າແນວລະດັບນ້ຳຖ້ວມ 50 ຊັງຕີແມັດ , ແທງຮ່ອງຫລືສອຍຮ່ອງປະຕູນ້ຳເພື່ອລະບາຍນ້ຳອອກ , ຂະຫນາດຮ່ອງກວ້າງ 1,5 ແມັດ , ເລິກ 1 ແມັດ , ເນື້ອທີ່ຮ່ອງກວ້າງ 0,5-0,7 ແມັດ , ໃຊ້ໄລຍະປູກ 5x5ແມັດ . ຖ້າຫາກເນື້ອທີ່ປູກເປັນດອນຄວນໄຖພູນເພື່ອກຳຈັດຫຍ້າແລະເຮັດໃຫ້ດິນແຕກອອກຈາກກັນ , ໃຊ້ໄລຍະໃນການປູກ 4x46x6ແມັດ , ທຸກຢ່າງແມ່ນຂຶ້ນຢູ່ກັບຄວາມອຸດົມສົມບູນຂອງດິນ .
ວິທີການປູກ ຄວນປູກໃນລະດູຝົນຈະເປັນການດີເພາະລະດູຝົນຈະເຮັດໃຫ້ດິນອ່ອນ , ການຂຸດຂຸມງ່າຍ , ຄວນຂຸດຂຸມປູກໃຫ້ມີຂະຫນາດກວ້າງແລະເລິກປະມານ 50 ຊັງຕີແມັດ , ປະສົມດິນ , ຝຸ່ນຄອກແລະປຸ໋ຍຣ໌ອດຟໍສເຟດເຂົ້າດ້ວຍກັນໃນຂຸມໃຫ້ສູງປະມານ 2 ໃນ 3 ຂອງຂຸມ , ຍົກຖົງກ້າເບ້ຍໄມ້ວາງໃນຂຸມໂດຍໃຫ້ລະດັບຂອງດິນໃນຖົງສູງກວ່າລະດັບດິນປາກຂຸມເລັກນ້ອຍໃຊ້ມີດທີ່ຄົມແລ່ງຖົງຈາກກົ້ນຖົງຂຶ້ນມາຮອດປາກຖົງທັງສອງດ້ານ (ຊ້າຍແລະຂວາ ), ດຶງຖົງຢາງອອກໂດຍລະວັງຢ່າໃຫ້ຖົງແຕກແລ້ວຖົມດິນທີ່ເຫລືອລົງໃນຂຸມ , ຂົ່ມດິນບໍລິເວນຕົ້ນໃຫ້ແຫນ້ນ , ປັກໄມ້ຫລັກແລະມັດເຊືອກໄວ້ເພື່ອປ້ອງກັນລົມພັດແຮງ , ຫາຫຍ້າຫລືເຟືອງແຫ້ງມາປົກບໍລິເວນຕົ້ນຫົດນ້ຳໃຫ້ຊຸ່ມ , ເຮັດຮົ່ມເພື່ອຊ່ວຍກັນແສງແດດ .
ການດູແລຮັກສາ ຄວນໃຫ້ນ້ຳຢ່າງສະຫມ່ຳສະເຫມີໂດຍສະເພາະໃນໄລຍະທີ່ປູກໃຫມ່ໆ , ຫົດນ້ຳມື້ລະເທື່ອເປັນຢ່າງນ້ອຍ (ກໍລະນີຝົນບໍ່ຕົກ ) ຫລັງຈາກປູກໄດ້ປະມານ 15ມື້ , ຫມາກນາວສາມາດຕັ້ງຕົ້ນໄດ້ແລ້ວຫົດນ້ຳເດືອນລະ 2-3ເທື່ອແລະຄວນຫາວັດຖຸມາປົກດິນບໍລິເວນຕົ້ນເພື່ອຊ່ວຍຮັກສາຄວາມຊຸ່ມຊື່ນ , ຄວນເລີ່ມງົດການໃຫ້ນ້ຳຕັ້ງແຕ່ໄລຍະເດືອນມີນາເປັນຕົ້ນໄປຈົນເຖິງໄລຍະອອກດອກເພື່ອໃຫ້ຫມາກນາວສະສົມອາຫານໃຫ້ສູງເຖິງລະດັບທີ່ສາມາດສ້າງຕາດອກໄດ້ , ປົກກະຕິຫມາກນາວຈະອອກ ດອກເດືອນເມສາຫາເດືອນພຶດສະພາ , ຫລັງຈາກຫມາກນາວອອກດອກແລະກຳລັງເປັນຫມາກອ່ອນເປັນໄລຍະທີ່ຫມາກນາວຕ້ອງການນ້ຳຫລາຍເພື່ອໃຊ້ໃນການຈະເລີນເຕີບໂຕຂອງຫມາກ .
ການໃສ່ປຸ໋ຍ ຫລັງຈາກຫມາກນາວອາຍຸໄດ້ 3-4 ເດືອນຄວນໃສ່ປຸ໋ຍເຄມີ , ຝຸ່ນຄອກຫລືຝຸ່ນບົ່ມປະມານຕົ້ນລະ 0,5 ກິໂລກກຣາມ , ກໍລະນີໃສ່ປຸ໋ຍເຄມີຄວນໃສ່ຫລັງຈາກພູນດິນກຳຈັດຫຍ້າແລ້ວໂຮຍໃສ່ບໍລິເວນອ້ອມຮອບພຸ່ມແລ້ວກໍ່ຫົດນ້ຳຕາມເພື່ອໃຫ້ປຸ໋ຍລະລາຍ . ເມື່ອຫມາກນາວອາຍຸໄດ້ 1 ປີໃຫ້ໃສ່ປຸ໋ຍຫມາກປະມານຕົ້ນລະ 300 ກຣາມແລະພໍຫມາກນາວອາຍຸໄດ້ 2 ປີກໍ່ເພີ່ມປະລິມານປຸ໋ຍໂດຍໃສ່ປີລະ 2 ເທື່ອໆລະປະມານ 1 ກິໂລກຣາມ . ທັງຫມົດນີ້ແມ່ນຂຶ້ນຢູ່ກັບຄວາມອຸດົມສົມບູນຂອງຕົ້ນແລະເມື່ອຫມາກນາວອາຍຸເຂົ້າປີທີ່ 3 ກໍ່ຈະເລີ່ມໃຫ້ຫມາກ , ໃນໄລຍະກ່ອນອອກດອກປະມານ 1-2 ເດືອນໃຫ້ໃສ່ປຸ໋ຍເພື່ອເລ່ງການຈະເລີນເຕີບໂຕໃນໄລຍະທີ່ຍັງບໍ່ອອກດອກໃນໄລຍະເລ່ງການອອກດອກປະມານ 0,5-1 ກິໂລກຣາມຕໍ່ຕົ້ນ , ປະລິມານທີ່ໃຊ້ຂຶ້ນຢູ່ກັບອາຍຸຂອງຕົ້ນພືດໂດຍໃສ່ໃນປະລິມານເຄິ່ງຫນຶ່ງຂອງອາຍຸຕົ້ນ .